مجبور باپ نے بیمار بیٹے کو ہلاک کردیا

حیدرآباد۔22جنوری(اعتماد نیوز) مزید علاج کی سکت سے مجبور اور تکلیف برداشت نہ کرتے ہوئے ایک باپ نے اپنے کمسن بیٹے کو ہلاک کردیا ۔یہ دل دہلادینے والا واقعہ آج حیات نگر پولیس اسٹیشن کے حدود میں پیش آیا ۔تفصیلات کے مطابق سری سیلم اور سپنا ساکن تارا متی پیٹ کی چند سال قبل شادی ہوئی ۔انہیں 3سالہ اکلوتا بیٹا بالا ملیش تھا ۔پیدائش سے ہی لڑکا گردے کے عارضہ میں مبتلا تھا ۔اسے کئی ڈاکٹروں سے رجوع کروایا گیا ۔ڈاکٹرس نے سری سیلم کو بتایا کہ آپریشن کے بعد بھی اس کے بیٹے کے صحت مند ہونے کے امکانات نہیں ہیں ۔اس نے اپنے بیٹے کے علاج پر کافی رقم خرچ کی تھی اور مزید رقم خرچ کرنے کی اس میں سکت نہیں تھی ۔کم عمر بچہ اکثر درد کی شدت سے رویا کرتا تھا ۔آج صبح کی اولین ساعتوں



میں بچہ درد سے رورہا تھا اس دوران سری سیلم نیند سے بیدار ہوا اور اس نے اپنے بیٹے کو مکان کی چھت پر لے جاکر وہاں موجود پلاسٹک کے واٹر ٹینک میں ڈال دیا جس کے نتیجہ میں بچہ کی موت واقع ہوگئی ۔بچہ کو واٹرٹینک سے نکالا گیا تب تک وہ دم توڑ چکا تھا ۔پولیس نے باپ کے خلاف قتل کا مقدمہ درج کرلیا ۔